Игнатьева Валентина Ивановна, И.Я.Яковлев ячĕллĕ Чăваш патшалăх педагогика университечĕн чăваш филологи факультечĕн доценчĕ 55 çул тултарать.

Унăн пĕтĕм пурнăçĕ, ĕçĕ-хĕлĕ шкулпа çыхăннă. Валентина Ивановна пирки республикăри хуласенчи шкулсенче ачасене чăвашла вĕрентес  ĕçе пуçлакансенчен пĕри тесе çирĕппĕнех калама пулать.  В. Игнатьева – пуçламăш классем валли пичетлесе кăларнă учебниксемпе пособисен, меслетлĕх кĕнекисен авторĕ. Хальхи вăхăтра та вăл, учительсене пулăшас тĕллевпе, шкул практикинче ку таранччен тунă çитĕнÿсене системăна кĕртет, çĕнĕ шухăшсемпе пуянлатать.

Валентина Ивановнăн ĕçĕ-хĕлĕн тепĕр енĕ – учительсене хатĕрлес ĕç. Çак ĕçе вăл 1991 çулта кÿлĕннĕ те паян кун та ырми-канми тăрăшса ĕçлет. Ăна Вĕрентÿ институтĕнче те тăтăшах курма пулать. Чăваш чĕлхи вĕрентекенĕсен пĕлĕвне ÿстермелле-и е шкулсем валли вĕрентÿ меслечĕсен кĕнекисене вăхăт ыйтакан шайпа килĕшÿллĕн хатĕрлемелле – çак ĕçсене пурне те хутшăнать.

Чылай çул хушши Игнатьева В.И. Чăваш республикин вĕренÿпе çамрăксен политикин министерствин вĕрентÿпе меслетлĕх канашĕн членĕ пулса ĕçлет. Çулсерен тĕрлĕ кĕнеке унăн алли витĕр тивĕçлĕ рецензисем илсе тухса  шкула çитет.

Хаклă юбиляра Чăваш Республикин вĕренÿпе çамрăксен политикин министерстви чаплă юбилей ячĕпе саламлать, тăван халăхăмăрăн пуласлăхĕшĕн малалла та пархатарлă ĕçлесе пыма çирĕп сывлăх, иксĕлми вăй-хал сунать.