Раççей Федерацийĕн субъекчĕсенчи вĕрентĕве ертсе пыракансен Чăваш Енри канашлăвĕн программи анлă пулчĕ. РФ вĕрентÿпе наука министрĕ Андрей Фурсенко кĕçнерни кунхи тĕл пулусене Раççейри конкурсра çĕнтернĕ Шупашкарти электромеханика колледжĕнчен пуçларĕ. ЧР Президенчĕпе Н.Федоровпа тата вĕрентÿпе çамрăксен политикин министрĕпе Г.Черновăпа пĕрле вăл колледж никĕсĕ çинче машиностроени валли рабочисемпе специалистсем хатĕрлекен хальхи технологи центрĕпе паллашрĕ. Центрта республикăн ĕç рынокĕнчи лару-тăрăва лайăхлатас тĕллевпе йышăннă программипе килĕшÿллĕн халăха хушма профессисене алла илме пулăшаççĕ.

Министра колледж федерацин халăха ĕçпе тивĕçтермелли программине мĕнле хутшăнни те кăсăклантарчĕ. Ăна пурнăçа кĕртме тытăннăранпа колледжра 100 ытла çитĕннĕ çынна çĕнĕ ĕçе вĕрентнĕ.

А.Фурсенко электроникăпа электротехника, электричество аппарачĕсен хальхи технологи оборудованийĕ вырнаçтарнă лабораторисенче пулса курчĕ, шкул ачисем валли профиль вĕрентĕвне мĕнле йĕркеленипе паллашрĕ. Андрей Александрович колледж предприятисене кирлĕ специалистсем хатĕрлес ыйтусемпе тĕллевлĕ ĕçленипе кăмăллă юлнине те палăртмалла.

Унтан федераци министрĕпе республика Президенчĕ Раççейĕн субъекчĕсенчи вĕрентÿ сферинчи ертÿçĕсен Чăваш оперăпа балет театрĕнче иртнĕ пленарлă ларăвне хутшăнчĕç. Андрей Фурсенко Николай Федорова ăшшăн йышăннăшăн тав турĕ, Чăваш Ен çĕршыври вĕрентÿ тытăмĕнче яланах малтисен йышĕнче пулнине палăртрĕ. Пысăк канашлăва ирттерме, вĕрентÿри çивĕч ыйтусене, 2010 çулхи тĕп тĕллевсене сÿтсе явма Чăваш Республикине ахальтен мар суйласа илнĕ. А.Фурсенко министр малашне çакăн пек канашлусене Мускавра мар, регионсенче ирттересси йăлана кĕрессе пĕлтерчĕ, мĕншĕн тесен вĕсен паха опычĕ пуриншĕн те усăллă пулĕ.

“Чăваш çĕрĕ çинче Раççей вĕрентĕвĕн ăс-хакăл элитин представителĕсен йышлă ушкăнне саламлама питĕ хавас, - терĕ Николай Федоров хăйĕн сăмахĕнче. - Регионсенчен чылайăшĕпе тĕрлĕ енĕпе, çав шутра вĕрентÿ сферинче те, çыхăну тытатпăр, вĕрентĕве çĕнетсе улăштарас тĕлĕшпе пухнă опытпа паллаштаратпăр, ыттисен опытне вĕренетпĕр. Чăваш халăх ăслăлăхĕнче çакăн пек каларăш пур: “Кашни ĕçĕн хăйĕн кĕвви”. Пĕр-пĕринчен малта пыракан ĕçсен кĕввине вĕренни питĕ усăллă тесе шухăшлатăп”. Николай Васильевич çынсен пурнăç шайне ÿстерес ыйтупа юлашки çулсенче тунă çитĕнÿсемпе, инноваци аталанăвĕн модельне ĕçе мĕнле кĕртсе пынипе паллаштарчĕ. Вăл палăртнă тăрăх, экономикăри ÿсĕмсемпе тата инвестици илĕртÿлĕхĕпе вĕрентÿ шайĕпе пахалăхĕ хушшинче тÿрĕ çыхăну пур. Паян инвесторсем аталаннă инфратытăмлă, пысăк квалификациллĕ специалистсемлĕ регионсемпе ĕçлесшĕн. Çакна шута илсе республикăра çĕнĕ, паха технологи меслечĕсем шырас ĕç самантлăха та чарăнмасть. Сăмах май, Чăваш Енре 1996 çулта йышăннă “Çĕнĕ шкул” комплекслă программа витĕмĕпе вĕрентÿ учрежденийĕсен пурлăх-техника никĕсĕ çĕнелсе улшăнчĕ, пĕлÿ пахалăхĕ çĕнĕ шая çĕкленчĕ.

Чăваш Ен федерацин, тĕнчен пилот программисене хутшăнни пĕлтерĕшлĕ улшăнусем тума пулăшать. Кунта шкулсен, пуçламăш тата вăтам професси пĕлĕвĕн учрежденийĕсен тытăмне çĕнетсе улăштарни те, информатизаци те, Патшалăхăн пĕрлехи экзаменĕ те кĕреççĕ. Президент мĕн пур шайра пĕлÿ илме пĕр пек условисем туса парас ĕçре икĕ çул каялла йышăннă Чăваш Енре вĕрентĕве 2040 çулччен аталантармалли стратеги пысăк вырăн йышăннине пĕлтерчĕ. “Учитель çулталăкĕнче вĕрентекенсен икĕ хут вăйлăрах, тата лайăхрах кăтартусемпе ĕçлеме тивет”, - терĕ вăл, çак енĕпе ăнăçу сунчĕ.

Канашлура “Вĕрентÿ” наци проекчĕн иртнĕ çулсенчи кăтартăвĕсене пĕтĕмлетрĕç, çĕнĕ тĕллевсене палăртрĕç. Андрей Фурсенко федерацин “Пирĕн çĕнĕ шкул” программине пурнăçа кĕртсе 21-мĕш ĕмĕре тивĕçлĕ çĕнĕ шкулсем йĕркелессипе тата тимлĕрех ĕçлемеллине каларĕ. Вĕсенче хальхи оборудовани пулмалла, пысăк квалификациллĕ специалистсем ĕçлемелле. Министр Раççей Президенчĕ Д.Медведев Федераци Пухăвне янă Çырăвĕнче вĕрентÿпе наукăна аталантарас пирки çĕкленĕ ыйтусемпе хушусене пурнăçа кĕртмелли çул-йĕр пирки чарăнса тăчĕ. Педагогсене ĕçшĕн тÿлес, вĕсене компьютер сечĕпе çыхăнтарса пĕр-пĕрин опытне вĕренме, квалификацие ÿстерме условисем туса парас тата ытти нумай ыйтăва хускатрĕ. “Кашни учителĕн пĕлĕве ÿстерсе пымалла. Аталанман, çĕнĕ технологисене вĕренме тăрăшман çынсен шкултан кайма тивет, мĕншĕн тесен ачан тавра курăмĕ тăрăх ăна вĕрентекен педагога хаклама пулать”, - çапла çирĕплетрĕ Андрей Александрович.

2010 çулта “Çулталăк учителĕ” конкурса, шкул ачисен предмет олимпиадисене, ППЭ ирттерес, массăллă информаци хатĕрĕсемпе çыхăну тытас тата ытти ыйтупа тĕплĕ калаçу пулчĕ. ЧР вĕрентÿпе çамрăксен политикин министрĕ Галина Чернова республикăра Вĕрентĕве çĕнетсе улăштармалли комплекслă проект мĕнле ĕçе кĕрсе пыни çинчен доклад турĕ.

Лару хыççăн Андрей Фурсенкăпа Николай Федоров И.Ульянов ячĕллĕ Чăваш патшалăх университетне çул тытрĕç. Унта вĕсем аслă шкулти ăсчахсем шухăшласа кăларнă нанотехнологисен тата энергие перекетлемелли меслетсен куравĕпе паллашрĕç. Профессорсемпе, преподавательсемпе ирттернĕ “çавра сĕтел” калаçăвĕнче “Аслă шкул ăслăлăхĕн Раççейĕн социаллă пурнăçпа экономикине аталантарас тĕлĕшĕнчи пĕлтерĕшĕ. Ăс-хакăл ĕçĕн кăтартăвĕсемпе ăслăлăхпа çыхăннă производствăра тухăçлă усă курма пĕчĕк предприятисем йĕркелесси” ыйтăва сÿтсе яврĕç. Андрей Фурсенко Раççей аслă шкулĕсене реструктуризацилес ĕç пуçланнине пĕлтерчĕ: “Паян çĕршывра - 1500 аслă шкул, 2200 филиал. Ку - йĕркеллĕ мар, - терĕ вăл. - Лайăххисем, чăннипех паха специалистсем хатĕрлекен инноваци технологийĕсене çул паракан, ăслăлăха аталантаракан, производствăпа тачă çыхăнса ĕçлекен аслă шкулсем кăна юлаççĕ. Çакна асра тытма ыйтатăп”. Калаçу вĕçленсен министр Раççей Президенчĕн çамрăксен премийĕн лауреачĕсене наградăсем пачĕ.

Программăпа килĕшÿллĕн Андрей Фурсенкăпа Николай Федоров Шупашкарти 5-мĕш гимназире Раççей Федерацийĕн Президенчĕн грантне тивĕçнĕ учительсемпе тĕл пулчĕç. Министр вĕрентÿ пахалăхне лайăхлатас ыйтусем çинче уйрăмах чарăнса тăчĕ: “Ачасене тарăн пĕлÿллĕ педагог кăна лайăх вĕрентме пултарать. Халĕ çĕршыври мĕн пур педагога аттестацилемелли çĕнĕ тытăм хатĕрлеççĕ”.

Оперăпа балет театрĕнче канашлăва пĕтĕмлетекен ларăва хутшăннă хыççăн Андрей Фурсенкăпа Николай Федоров федераци тата республикăри массăллă информаци хатĕрĕсен журналисчĕсен ыйтăвĕсене хуравларĕç.