Юпа уйӑхӗн 20мӗшӗнче республикӑна тата 16 шкул автобусӗ килсе ҫитрӗ. ПАЗ автобуссем ачасене илсе ҫӳреме питӗ меллӗ, хӑрушсӑрлӑх пиҫиххийӗсем, шкул сумкисене хумалли ятарлӑ вырӑн тата ҫул ҫӳреве   ҫӑмӑллатма   пулӑшакан   ытти   хатӗр   пур.

Сӑмах май, ҫӗнӗ вӗрену ҫулӗ тӗлне шкулсене ҫӗнӗ 15 автобуспа тивӗҫтернӗччӗ ӗнтӗ. 2001 ҫултанпа, Чӑваш Енре Президентӑн "Шкул автобусӗ" программи ӗҫлеме пуҫланӑранпа, ачасене никӗс шкулсене илсе ҫӳреме 318 автобус туяннӑ. Вӗсем куллен 13 пин ачана вӗренту учрежденийӗсене ҫитереҫҫӗ, уроксем хыҫҫӑн киле леҫеҫҫӗ. Халӗ шкул автобусӗсен шучӗ 334а   ҫитрӗ.

ЧР вӗрентӳпе ҫамрӑксен политикин министрӗ Г.П.Чернова Шупашкарти оперӑпа балет театрӗ умӗнчи лапамра иртнӗ чӑнчӑн уявра тӗрлӗ районти шкулсен представителӗсене автобуссен уҫҫисене пачӗ, "Вӗрентӳ" наци проекчӗпе республикӑн "Шкул автобусӗ" программи ял ачисене паха пӗлӳ илме, ӑсхакӑла, пултарулӑха аталантарма ҫӗнӗ майсем туса панине    палӑртрӗ.