Кăçалхи çул – Ырă ĕçсен çулталăкĕ – Сухайкасси вăтам шкулĕнче вĕренекенсемпе учительсемшĕн чăннипех ырă та савăнăçлă пулăмпа пуçланчĕ: Чăваш Республикин вĕрентÿ тата çамрăксен политикин министрĕ Г.Чернова шкула çичĕ çĕнĕ йышши компьютер парнелерĕ.

Компьютерпа ĕçлеме пирĕн шкулта ачасем информатика урокĕсенче кăна мар, «Çамрăк информатик» кружокне çÿресе те хăнăхаççĕ, 5-11 классенче вĕренекенсем унта хăйсен пĕлĕвне тарăнлатаççĕ. Çĕнĕ техника хатĕрĕсемпе пуянланнине пула халĕ кашни вĕренекен пушă вăхăтра компьютерпа ытларах ĕçлет, Интернетпа усă курать. Пултаруллăрах вĕрентекенсем хăйсен урокĕсенче ачасене инноваци технологийĕсемпе паллаштараççĕ. Шкул коллективĕ те, ачасен ашшĕ-амăшĕсем те Галина Петровнăна шкула хаклă парне кÿнĕшĕн чĕререн тав тăваççĕ.

Министр килсе кайнă хыççăн, кăрлачăн 24-мĕшĕнче, пирĕн шкулта район администрацийĕн вĕрентÿ управлени методисчĕ А.Димитриев ертсе пынипе информатика учителĕсен семинарĕ иртрĕ. Унта малтанах шкул директорĕ Е.Кузьмина ялти пĕлÿ лаççин ĕçĕ-хĕлĕ çинчен тĕплĕн каласа пачĕ, информатика кабинетĕнче паллашу экскурсийĕ йĕркелерĕ.

Семинарта учительсем шкулсен сайчĕ пирки анлă калаçу пуçарчĕç, пĕрне-пĕри хăйсен опычĕпе паллаштарчĕç, ачасене тарăнрах пĕлÿ парас тĕлĕшпе ĕçри çĕнĕ çул-йĕрсене сÿтсе яврĕç.