Авăн уйăхĕн пуçламăшĕ. Вăтакас Татмăш шкулне тата ача садне çÿрекенсем Канашри педагогика колледжĕнчен килекен хăнасене ирех чăтăмсăр кĕтрĕç. Мĕн тĕллевпе çÿреççĕ-ха педколледж представителĕсем районти пĕлÿ учрежденийĕсем тăрăх теме пултăрăтăр эсир. Вăрттăнлăхĕ акă мĕнре.
Çĕнĕ вĕренÿ çулĕ пуçланас умĕн Канашри педагогика колледжĕнче Кĕнеке тата Ача çулталăкĕсене халалласа йĕркеленĕ акци вĕçленчĕ. Çак акци «Единая Россия» фракци членĕн, Чăваш Республикин Патшалăх Канашĕн депутачĕн, колледж директорĕн Г.Косолаповăн ырă пуçарăвĕпе килĕшÿллĕн тата вĕрентÿ учрежденийĕн коллективĕпе студентсем пулăшнипе иртнĕ.
Вăтакас Татмăш шкулĕпе Канашри педагогика колледжне тахçанхи туслăх пĕрлештерсе тăрать. Шкулти педагогсемпе ача сачĕн ĕçченĕсенчен ытларахăшĕ педколледжран вĕренсе тухнине те палăртма кăмăллă. Иртнĕ вĕренÿ çулĕн вĕçĕнче ЧР Патшалăх Канашĕн депутачĕ, «Единая Россия» фракци членĕ, колледж директорĕ Г.Косолапов пулăшнипе шкулти информатика класĕнче электричество проводкине тĕпрен улăштарса çĕнетнĕ. Студентсемпе вырăнта тухса наука конференцийĕсем ирттересси те ырă йăлана кĕнĕ.
«Ачасене савăнтарма тата ырă тума васкăр» ырă кăмăллăх акцине педколледжри педагогсем те, студентсем те хутшăннă. Акципе килĕшÿллĕн вĕсем килти библиотекăсенчи кĕнекисене тата хăйсем выляса ÿснĕ теттисене ял ачисене парнелерĕç. Пулас педагогсем парнеленĕ кашни кĕнеке тата тетте хăйĕн хуçине тупасса, пĕлÿ тĕнчине çĕнĕ çул уçса парасса чунтан шанаççĕ.
Акцие пĕтĕмлетнĕ май çакна палăртма пулать, студентсемпе педагогсем çак ырă кăмăллăх акци тапхăрĕнче 250 ытла ача-пăча кĕнеки тата çĕршер тетте пуçтарса ачасене парнеленĕ.
Çак пĕлтерĕшлĕ кун пуçтарса хатĕрленĕ кĕнекесемпе теттесене Вăтакас Татмăш шкулĕпе ача садне ЧР Патшалăх Канашĕн депутачĕн Г.Косолаповăн пулăшуçи, педагогика наукисен кандидачĕ О.Краснова парнелерĕ. Çĕнĕ вĕренÿ çулĕ пуçланнă ятпа педагогсен коллективне саламланă май вăл çапла пĕлтерчĕ: «Вĕрентекенĕн чи малтанах ачасене юратмалла, кайран тин предмета вĕрентме тытăнмалла». Унтан Ольга Александровна шкул директорне Л.Павлована хăйĕн библиотекинче упранакан кĕнекисене парнелерĕ.