Иртнĕ юнкун районти Культурăпа кану центрĕнче вĕрентекенсен конференцийĕ иртрĕ. Вĕрентÿ ĕçченĕсем райадминистрацин вĕрентÿпе çамрăксен политикин пайĕн пуçлăхĕ Ю.Соколов тунă доклада итлерĕç.

Вĕрентÿ пахалăхĕ кирек хăш вăхăтра та пĕлтерĕшсĕр пулман. Юлашки вăхăтра вăл пушшех çивĕчленчĕ, мĕншĕн тесен ачасене пĕлÿ пани кăна çителĕксĕр, пирваях вĕсене ĕçлес, пурăнас пултарулăха вĕрентмелле, хăвăрт улшăнса пыракан тĕнчере вĕсем хăйсене çухалса кайнăн ан туйччăр. Вĕрентĕвĕн пурнăçран татăлса пымалла мар, кăшт маларах та утмалла.

Докладчикăн тĕп шухăшĕ çакă пулчĕ. Доклада сÿтсе явма нумай вĕрентекен хутшăнчĕ. Конференци ĕçне çавăн пекех район пуçлăхĕ В.Кириллов, ЧР Патшалăх Канашĕн Председателĕн заместителĕ Г.Васильев, ЧР культура министрĕн заместителĕ А.Белов, Вĕрентÿпе çамрăксен политикин министерствин пай начальникĕ М.Федотов тата ытти яваплă çынсем хутшăнчĕç.